É moi probable que te atoparas cun bot conversacional algunha vez e incluso interactuaras con el. Entón, xa tes unha idea do que é un chatbot e para que serve.

Cada vez máis marcas recorren a estes sistemas informáticos para mellorar a experiencia dos seus clientes na súa páxina web, conseguir novos contactos e axudar nos procesos de compra.

Que é un chatbot?

É un asistente dixital que, a través de conversas con usuarios por mensaxes de texto, multimedia ou voz, lles axuda en diferentes temas ou procesos para os que está programado. Por exemplo, o chatbot pode preguntar a un cliente que está en medio do proceso de compra dun produto e tarda en pagar se ten algunha dúbida e ofrecerlle distintas posibilidades.

Podes implantar este sistema na túa páxina web, en WhatsApp, en correos electrónicos, dentro de aplicacións, en Facebook…

Tipos de chatbots

Os bots conversacionais poden ser de distintos tipos. Imos ver cales son atendendo a diferentes criterios:

• Segundo a forma de interactuar co usuario
• Segundo a tecnoloxía empregada
• Segundo a súa finalidade

Imos detallar un pouco cada unha destas categorías para que as entendas mellor e poidas saber que tipo de asistente virtual é máis adecuado para ti.

Segundo a forma de interactuar co usuario

Tal e como mencionamos antes, os chatbots poden empregarse en múltiples plataformas, pero hai que definir como vai ser a comunicación entre os teus clientes e o asistente:

1. Comunicación por texto: é frecuente atoparte con este tipo de chatbots, pero implementalos ben é bastante difícil, porque deben dispoñer dun número suficiente de respostas para aclarar as dúbidas máis habituais.
2. Interacción multimedia: este é o asistente máis común que nos atopamos en páxinas web ou redes sociais. Consiste nun diálogo no cal o asistente dá unha serie de opcións para facer clic e, segundo o que selecciones, recibirás unha resposta. Ademais de respostas de texto, tamén poden ser configurados para responder con gifs, imaxes ou vídeos. Un exemplo é unha campaña que fixo Marvel en Facebook, na cal podías falar co teu superheroe favorito dos Avengers.
3. Comunicación por voz: estou seguro de que xa pensaches en Alexa ou Siri e, si, tamén son chatbots. Este sistema é igual de complexo que o de texto, debido a que cando fas unha pregunta a un asistente de voz ten que dispoñer dunha resposta personalizada.

A integración de bots conversacionais nos altofalantes intelixentes cada vez é máis común. En Alexa existe a posibilidade de xogar con Akinator, para que adiviñe o personaxe no que estás pensando.

Segundo a tecnoloxía empregada

O grao de personalización das respostas dependerá tamén da tecnoloxía que empreguen.

1. Resposta de Interacción de Textos (ITR): esta tecnoloxía vai ligada ós chatbots con interaccións multimedia. Neste caso non fai falta intelixencia artificial, xa que consiste en programar as opcións que a marca queira dar ó usuario e as respostas que ofrecerá. É unha opción moi boa para conseguir que os teus clientes teñan a sensación de estar falando cunha persoa que lles está axudando.
2. Cognitiva: emprega a intelixencia artificial e a súa base de datos para poder entender a linguaxe natural e interpretar o que queren os usuarios en cada momento. Esta tecnoloxía é a máis complexa e emprégase en asistentes de texto ou voz.
3. Palabras clave: esta é unha opción intermedia entre as dúas alternativas anteriores. Asigna respostas a determinadas palabras chave e cando recoñece que escribiches ou pronunciaches unha delas, ofréceche a solución asignada.

Segundo a súa finalidade

Estes sistemas permitiranche:

1. Xerar contactos: a través de formularios de recollida de datos.
2. Proporcionar atención ó cliente solucionando as súas dúbidas.
3. Axudar en procesos de compra: cun sistema de axuda conversacional nun ecommerce poderás solucionar as dúbidas dos teus clientes e facer que finalicen as súas compras.
4. Imaxe de marca: estes chatbots son empregados principalmente en redes sociais.

Agora que xa sabes que é un chatbot e como pode axudar á túa empresa, tes algunha outra dúbida que a nosa axencia de márketing en Vigo poida solucionar?