Revisado o 31/01/23 – Nos últimos anos, deseñar campañas para firmas volveuse cada vez máis difícil, xa que hai múltiples formas de facer publicidade para a túa empresa e cada modelo de negocio require de formatos diferentes.
Durante a crise do COVID-19, a publicidade on line cobrou moitísima importancia, en gran medida porque no período de confinamento, era unha forma eficaz que tiñan as marcas para impactar cos seus clientes.
Pasos a seguir nunha campaña de publicidade para a túa empresa
Realizar unha campaña non é un proceso sinxelo, nin rápido. Para que sexa efectiva débense seguir unha serie de pasos, non basta simplemente con pagar pola publicidade. Ten que haber un estudo detrás de todos os pasos da campaña, que son estes:
Definir o obxectivo
Este é o primeiro paso de toda campaña publicitaria. Consiste en seleccionar as metas que pretendes acadar: se buscas incrementar as vendas, dar notoriedade á túa marca ou captar clientes, por exemplo.
Concretar o target
Unha vez definas a finalidade da campaña, tes que decidir a quen a vas enfocar, facer un perfil do público obxectivo: se te dirixes a homes, mulleres ou ambos; o rango de idade, etc.
Facer briefing
Este paso consiste en concretar o obxectivo da túa campaña, o teu target, a definición dos teus produtos ou servizos e o valor engadido que achegan aos teus clientes. É importante tamén que non perdas de vista que fai a túa competencia e como está o mercado. De cara ao futuro, é útil gardar este estudo nun documento, para consultar calquera dúbida que poidas ter.
Elaborar unha mensaxe
Tanto o que contes como o modo en que o fagas comunican. Por iso, é importante definir unha mensaxe sinxela, que cale entre o teu público obxectivo e mostre os beneficios do produto ou servizo que queiras vender.
Debes definir a mensaxe poñendo ao cliente no centro, en liña cos preceptos do inbound márketing, facéndolle partícipe e invitándoo a conversar.
Elección dos medios para publicitarte
Unha vez teñas definida a mensaxe, toca escoller que medios son os idóneos para conectar co teu público obxectivo e posteriormente deseñar os grafismos adaptados a cada plataforma.
Deseño do plan de medios
É o momento de elaborar un plan no que queden reflectidos os formatos que vas empregar para os anuncios, as datas nas que van saír e o tempo que estarán activos.
Seguimento
É fundamental ir medindo en tempo real o funcionamento da túa campaña. O márketing dixital permíteche coñecer as reaccións dos teus clientes e do teu público potencial no momento no que reciben o impacto da túa publicidade. Iso permíteche ir perfilando detalles ou incluso parar unha campaña se non resulta efectiva.
Lanzamento
Unha vez realizados todos os pasos anteriores xa se pode lanzar a campaña de publicidade. Se todo se fixo ben, non deberían ter que facerse correccións na campaña.
Análise de resultados
Por último, é o momento de facer a valoración final. Cumpriches todos os teus obxectivos iniciais? Os prazos foron correctos? Cal é o feedback da campaña?
Vantaxes da publicidade para empresas
A publicidade pode ser moi efectiva á hora de impulsar un novo negocio, aumentar as vendas ou fidelizar aos teus clientes.
Distintos soportes permitirán inversións maiores ou menores, pero sempre enfocadas a:
- Proporcionar visibilidade á túa marca.
- Incrementar as vendas.
- Aumentar o número de clientes.
- Crear imaxe de marca.
- Achegarte ao teu público obxectivo.
Tipos de publicidade
A elección dos medios e soportes nos que publicitarte é tan importante como definir os obxectivos ou o público ao que enfocarás a túa campaña.
Atendendo ao soporte, a publicidade para empresas pode ser on line, audiovisual e impresa. Pero dentro destas 3 categorías hai moitas opcións. Imos velas:
Publicidade on line
- Banners: en algunhas ocasións o custo será por número de visualizacións e en outras por clic. Tamén podes ter como obxectivo que fagan clic nel para encher un formulario con datos. O custo dependerá do medio e do obxectivo fixado.
- E-mail márketing: enviar correos electrónicos con contido promocional ou informativo sobre os teus produtos ou servizos pode axudarche a mellorar a imaxe da túa marca ou empresa e a vender máis. Quen non picou cunha newsletter de FNAC, PC Componentes ou El Corte Inglés, que levante a man.
- Publicidade a través de SMS e WhatsApp: agora que cada vez recibimos menos SMS é sinxelo que lle prestemos máis atención. O WhatsApp Business, a versión gratuíta de WhatsApp para empresas, pode ser unha boa opción para ofrecer información adicional aos teus clientes. Permite mostrar localización, horarios, produtos…
- Publicidade en redes sociais: agora é a de maior alcance con menor inversión.
- Publicidade en vídeos: os contidos en vídeo teñen unha boa acollida na actualidade, especialmente en stories ou formatos de duración curta.
Publicidade audiovisual
- Publicidade en televisión: o seu custo elevado deixa fóra a pequenos negocios.
- Publicidade en radio: é moito máis residual que hai anos, pero a radio mantén un público fiel que sintoniza a diario determinados programas. Os datos sobre o seu público coñécense con menos exactitude que os dos que están ao outro lado da pantalla do ordenador ou do móbil, pero para determinados negocios poden ser útiles. Se o teu negocio é un restaurante, por exemplo, sabes que quen estea ao outro lado nunha emisora local pode ser un público potencial.
- Pantallas de vídeo: tenden a localizarse na rúa, en centros comerciais, en estadios… Nestas pantallas emítense anuncios, mensaxes publicitarias sinxelas ou incluso información da zona.
Publicidade impresa
- Publicidade en prensa ou revistas: este sector non vive o seu mellor momento, pero en prensa local ou especializada é sinxelo localizar a determinados perfís de lectores que poden coincidir co teu público obxectivo.
- Mupis e marquesinas: empresas grandes e pequenas aproveitaron estes soportes para captar a atención dos seus clientes. Dende negocios locais ata Netflix.
- Medios de transporte público: taxis, autobuses, metros… tenden a incorporar publicidade.
- Lonas e vallas publicitarias: o público obxectivo é máis ou menos o mesmo que antes, viandantes e condutores.
- Folletos: para ofrecer información de produtos, servizos, promocións…
En definitiva, á hora de facer publicidade para empresas hai moitos factores que definir antes de comezar a campaña. Por iso é recomendable pórse en mans de alguén que saiba como xestionala de forma adecuada.