Tras máis de dous meses dende a súa entrada en vigor, a ‘lei de influencers’ española só conseguiu reunir a 41 creadores de contido no Rexistro Estatal de Prestadores do Servizo de Comunicación Audiovisual. O prazo para inscribirse rematou o pasado 2 de xullo e na lista faltan nomes importantes como o de María Pombo ou Xurxo Carreño.
Como che contamos, o pasado 30 de abril, o Goberno de España aprobou o Real Decreto 444/2024 co que buscaba regular a actividade destes profesionais ou “usuarios de especial relevancia” e equiparalos con outros actores do sector audiovisual.
Esta lei, que entrou en vigor o 2 de maio, establece unha serie de criterios que unha persoa debe cumprir para ser considerada como ‘influencer’:
- Ter uns ingresos iguais ou superiores aos 300.000 € anuais derivados da súa actividade.
- Ter, polo menos, un millón de seguidores nunha única plataforma ou dous millóns ao sumar as cifras de todas as súas contas.
- Publicar, como mínimo, 24 vídeos ao ano.
Segundo o Real Decreto, os que entren dentro destas esixencias teñen que cumprir unha serie de obrigacións, como identificar os contidos publicitarios, protexer aos menores de idade ou inscribirse no Rexistro Estatal de Prestadores de Servizo de Comunicación Audiovisual.
O prazo para apuntarse nesta lista rematou o pasado 2 de xullo e, hoxe, só hai 41 influencers nela. Entre eles hai nomes recoñecidos como Tamara Falcó, Dulceida, Lola Lolita, Paula Echevarría, Ibai Llanos, Illo Juan ou El Rubius.
E quedaron fora do rexistro, quizais por non cumprir as condicións ou non inscribirse dentro do prazo, creadores influentes como María Pombo, con 3,2 millóns de seguidores en Instagram; ou Xurxo Carreño, con 4,5 millóns de seguidores en Instagram.
A continuación, tes a lista completa de influencers apuntados no Rexistro de Prestadores de Servizos de Comunicación Audiovisual:
