Blog

¡Acomódate!, es tiempo de lectura.

Internet é, sen dúbida, un dos maiores avances tecnolóxicos na historia da humanidade. Se estás lendo estas liñas significa que a rede forma parte do teu día a día. Como a través de Internet somos capaces de comunicar calquera tipo de información, é preciso coñecer as claves, que ten de diferente a escritura para a rede de redes. Para isto, propóñoche comparar a forma de escribir artigos atractivos para blog con, por exemplo, o modo de facelo na prensa tradicional. Non quero con este artigo entrar no debate de que medio é mellor, senón ofrecer tres claves para que os teus artigos sexan cada vez máis atractivos e cheguen a máis lectores.

Identifica ao teu público

Adecúa os contidos de forma que poidan ser entendidos por tódolos teus potenciais usuarios

Resulta fundamental en calquera aspecto da nosa vida (a publicitaria, a información, o mundo empresarial, etc.), pero máis se cabe na rede. A oferta en Internet é tan ampla que ter presente a quen nos diriximos é fundamental. Cando un escribe para un xornal tradicional editado en España, non ten que preocuparse por se o seu contido vai ser consumido en Latinoamérica. Porén, cando escribimos para a rede, si debemos ter en conta este tipo de factores, polo que é necesario adecuar os contidos de forma que poidan ser entendidos por tódolos nosos potenciais usuarios.

https://www.vincusys.gal/blog/quero-escribir-un-bo-artigo-pero-non-sei-como-comezar-como-escribir-un-bo-artigo/

O estilo é fundamental

A mellor forma é combinar estruturas breves e sinxelas con outras máis longas

Internet ofrécenos todo o espazo do mundo, pero non por iso debemos apropiarnos del. Procura que os teus textos conteñan a información necesaria para lograr escribir artigos atractivos, pero lembra que o bo se é breve é dúas veces bo. Non por dispor dun número ilimitado de caracteres temos que fatigar ao noso público con grandes textos que, moi posiblemente, non chegarán a ler enteiros. En canto ao tamaño das frases, o que mellor funciona na rede é a combinación de estruturas breves e sinxelas con outras máis longas. Non necesitas escribir como un robot, pero atopar o equilibrio será o teu mellor aliado.

Presta especial atención aos titulares

Os titulares son, tanto para as informacións publicadas en papel como na rede, a mellor oportunidade para que o noso contido sexa lido. Se algo permite a rede é apelar en maior medida a aquel que se atopa ante a pantalla, algo que rara vez é posible nun xornal. De feito, este tipo de fórmulas funciona moi ben para enganchar aos lectores. Lembra que contan cunha oferta extensa na rede. Pode que outro estea a falar do mesmo tema ca ti, así que o teu obxectivo debe ser facelo de forma máis atractiva.

Para que os teus titulares sexan efectivos, intenta dirixirte directamente aos teus lectores para que se sintan interpelados e interesados.

Foto: CollegeDegrees360

0 Comments

Submit a Comment

O teu enderezo electrónico non se publicará Os campos obrigatorios están marcados con *

Consulta las ayudas y subvenciones disponibles