Tiveches que afrontar algunha crítica dun dos usuarios da comunidade que xestionas? Os trolls saen dos alxubes para publicar nas túas páxinas? Tanto se respondiches cun si a ambas preguntas como se a resposta é non, pero temes que algo así poida sucederche, le con atención este artigo. Nel intentaremos axudarche para que este tipo de situacións non sexan parte do teu día a día na rede. Así poderás prever e resolver as posibles crises on line.
Pode que a rede sexa un dos lugares nos que estamos máis expostos aos comentarios e valoracións dos nosos seguidores (e tamén dos nosos detractores). Nas túas redes sociais, blogs ou páxinas web hai unha porcentaxe de persoas esperando o mínimo erro para criticarte. Ás veces, estas críticas están xustificadas porque somos humanos e podemos equivocarnos. Porén, sempre hai quen non espera a ter un motivo para intentar prexudicarnos mediante un comentario negativo. Prever, establecer un plan de actuación, responder ás posibles críticas e ser transparentes serán as túas mellores armas para que unha mensaxe que busque prexudicarte poida incluso beneficiarche.
https://www.vincusys.gal/blog/por-que-e-importante-xestionar-ben-as-crises-nas-tuas-redes-sociais/
Intenta adiantarte
O mellor para solucionar unha crise on line é non deixar que suceda
Parece obvio e sinxelo, pero a prevención será a mellor aliada da túa reputación en Internet. Se es capaz de detectar de onde poden vir as críticas, poderás elaborar un plan de actuación adecuado a aquilo que poida chegar a suceder nos teus espazos on line. Ademais, se son varios os encargados de xestionar o perfil corporativo, non descartes contar cun manual de boas prácticas. Así, o discurso da vosa marca irá acorde cos vosos principios en tódalas ocasións. Iso si, se non conseguiches evitar o inicio da crise, continúa lendo para evitar que se propague.
Responde sempre, incluso para recoñecer que non tes resposta
Quedarse calado non é a mellor opción
Os teus seguidores buscan respostas e por iso che escriben, aínda que sexa para criticarte. Trata de responder con educación a todos os comentarios, pero máis se cabe aos negativos. Se o fas, a túa comunidade observará que te preocupas polos posibles problemas derivados da actividade que realizas. As respostas deben ser rápidas pero tamén ricas en contido, un “tomamos nota” non serve. Se non tes a solución ao problema, debes admitilo e facerlle ver a aqueles que mostraron a súa queixa que vas traballar para solucionar a incidencia.
Non mintas e sé transparente
A mentira na rede págase cara, así que é mellor apartarse dela
Aceptar os nosos erros e ser transparentes coas persoas afectadas por eles, será moi ben visto pola nosa comunidade e moi útil na xestión de crise on line. Ao principio, podes tratar de arranxar os posibles problemas de forma pública, así todos saberán que tes interese en dar solución aos conflitos. Pero a transparencia ten os seus límites en aquelas accións que requiran a transferencia de datos persoais. Se te atopas ante un caso destas características, podes abordar a situación de forma privada co usuario en cuestión, todo co obxectivo de solucionar os seus problemas.
0 Comments